Биатлоннан ҚР Кубогы басталды

Бүгін Щучинск қаласындағы Қысқы спорт түрлері бойынша олимпиадалық даярлау орталығының базасында биатлоннан ҚР Кубогы басталды, деп хабарлайды Қазақстан Биатлоншылар Одағының баспасөз қызметі.

Бірінші күні спринтерлік жарысқа Абай, Ақмола, Ақтөбе, Алматы, Шығыс Қазақстан, Қарағанды, Павлодар, Солтүстік Қазақстан облыстары мен Алматы қалаларынан 110-ға жуық спортшы қатысты.

Алғашқы жарыс күнінің қорытындысы бойынша ерлер 7,5 км қашықтықта өнер көрсетіп, арасынан алматылық Темірлан Төлегенов көш бастады. Ол финишке 20:33.1 уақытта келсе, екінші болып ақмолалық Антон Башкиров 22.4 секундтан кейін, 20:55.5 уақытта мәре сызығына жетті. Қарағандылық Владимир Батрынча 22:06.0 уақытта үздік үштікке енді.

Әйелдер арасынан 6 км қашықтықта Елизавета Белецкая 19:28.4 уақытта бірінші болып, Дарья Климина 2,8 секунд айырмашылықпен 19:31.2 уақытта екінші болып, ал Надежда Пивоварова 20:09.0 уақытта үшінші болып аяқтады.

Жасөспірімдер арасынан Владислав Малыков 7,5 қашықтықта 20:43.8 уақытта топ жарса, Евгений Литвинов 17,5 секундқа кешігіп, 21:01.3 уақытта екінші болып, Артур Каданцев 21:22.9 көрсеткішпен үштікті аяқтады.

Жасөспірім қыздар құрамасы 6 км қашықтықта сынға түсіп, 20:16.6 уақытта Софья Унжакова бірінші, Ульяна Ардалионова 20:44.0 уақытта екінші, ал

Екатерина Мусохранова 20:49.7 уақытта үшінші орынды иеленді.

Ертең, 26 қарашада жарыстың соңғы күні өтеді. Спортшылар тағы да спринт дисциплинасы бойынша өнер көрсетеді.