Қазақстанда мықты резерв өсіп келеді: Лука Бормолини жас биатлоншыларымызбен жұмысқа кірісті
Лука Бормолини халықаралық биатлон қауымдастығына жақсы танымал. Оның жетекшілігімен Чехия әйелдер құрамасы әлемдік аренада жоғары нәтижелер көрсетті. Енді итальяндық сарапшы өзінің бай тәжірибесі мен заманауи дайындық әдістемесін біздің елімізге әкеліп отыр.
«Қазақстанға келгеніме өте қуаныштымын. Щучинскідегі Ұлттық қысқы спорт түрлері бойынша орталықтың инфрақұрылымы тамаша, әлемдік стандарттарға толық сай келеді. Бірақ ең бастысы — балалар. Мен олардың көзінен үлкен әлеует пен жұмысқа деген зор құлшынысты көрдім. Мұнда өте мықты резерв өсіп келеді. Дұрыс бағыт берілсе, бұл балалар болашақта үлкен табыстарға жете алады», — деді Лука Бормолини.
Оқу-жаттығу жиынына еліміздің түкпір-түкпірінен дарынды балаларды анықтау мақсатында біз ұйымдастырған «Grand Tour Biathlon» жобасының кезеңдерінде ең жоғары нәтиже көрсеткен жасөспірімдер жиналды.
Екі апта бойы жас спортшыларымыз итальяндық маманның жетекшілігімен дайындалады. Жаттығу бағдарламасына мыналар кіреді:
-Жылдамдық пен қысым жағдайында ату техникасын жетілдіру;
-Шаңғымен жүру техникасын түзету;
-Физикалық дайындық және заманауи қалпына келу әдістері.
Сонымен қатар, бұл жиынға жергілікті қазақстандық бапкерлеріміз де қатысуда. Бұл олар үшін шетелдік әріптесінен тәжірибе алып, еуропалық озық әдістемелерді меңгеруге және оны болашақта өз аймақтарында қолдануға таптырмас мүмкіндік.
Щучинскідегі оқу-жаттығу жиыны — жас спортшыларымызды халықаралық деңгейге дайындаудың маңызды кезеңі. «Grand Tour» көшбасшылары үшін бұл елден шықпай-ақ әлемдік деңгейдегі тәжірибені бойға сіңірудің бірегей мүмкіндігі.
Балалар спортына жоғары деңгейлі шетелдік мамандарды тарту — Федерацияның ұзақ мерзімді стратегиясының бір бөлігі. Біздің басты мақсатымыз — тек қазіргі ұлттық құраманы қолдау ғана емес, аймақтардағы жас таланттардың әлемдік деңгейдегі чемпион болып қалыптасуына мүмкіндік беретін үздіксіз әрі мықты жүйе құру.
