Биатлоншыларымыз Жаңа жылды неге шетелде қарсы алады?
Желтоқсан айындағы жарыстар циклі аяқталған соң, жаттықтырушылар штабы оқу-жаттығу жиынын (ОЖЖ) Словенияда өткізу туралы шешім қабылдады. Негізгі құрам спортшылары мереке күндері Қазақстанға оралмайды, 2026 жылды жұмыс режимінде қарсы алады.
Бұл шешімнің бірнеше маңызды себебі бар:
Елдер арасында ұзақ ұшулар мен уақыт белдеулерінің күрт өзгеруі ағза үшін үлкен стресс. Еуропада қалу арқылы спортшылар жүрек-қан тамырлары жүйесіне түсетін артық жүктемеден арылады, яғни акклиматизациядан сақтайды. Сондай-ақ, Әлем кубогінің қаңтардағы кезеңдері айдың алғашқы онкүндігінде басталып кетеді. Жаттығу процесіндегі тіпті екі күндік үзілістің өзі спортшының қарқынын төмендетіп, жинаған бабын жоғалтуына әкеп соғуы мүмкін. Ең бастысы-Олимпиадаға дайындық. Төртжылдықтың басты додасы - Италиядағы Олимпиада ойындары жақындап қалды. Поклюканың орта таулы климаты Италияның Антхольц трассаларына өте ұқсас. Мұндағы жаттығулар спортшылардың өкпесі мен бұлшықеттерін алдағы Олимпиаданың қиын соқпақтарына бейімдеуге мүмкіндік береді.
Әлемдік деңгейдегі биатлоншылар үшін Жаңа жылды үйде қарсы алмау - қалыпты жағдай және кәсіби этиканың бір бөлігі. Қазір Поклюкада барлық жағдай жасалған: сапалы қар, заманауи ату алаңы және Словенияны таңдаған әлемнің үздік командаларымен бірлесіп жаттығу мүмкіндігі бар.
«Әрине, әрқайсымыз мерекені жақындарымыздың қасында өткізгіміз келеді. Бірақ биылғы маусымның жауапкершілігі өте жоғары. Қазір әр күн санаулы. Олимпиада үзілісті кешірмейді, сондықтан біз үшін нағыз мереке – сапалы жаттығу мен тиімді қалпына келу процесі», - деп атап өтті жаттықтырушылар штабы.
Алда не күтіп тұр?
Поклюкадағы жиын қаңтар айының басына дейін жалғасады, содан кейін құрама Әлем кубогінің төртінші кезеңіне аттанады. Біз барлық жанкүйерлерімізге қолдауларыңыз үшін алғыс айтамыз. Мереке күндеріне қарамастан төгілген тер мен қажырлы еңбек алдағы жарыстарда нысанаға дөп тиген оқ пен мәредегі жылдам секундтарға айналатынына сенімдіміз.
Қазақстан биатлонының жетістіктері мен дамуына «Sport Qory» қолдау көрсетіп келеді.
Photo: Kevin Voigt
