Биатлоншылар қаруды шекарадан қалай өткізеді?
Қарапайым жолаушы үшін сапарға дайындық - чемодан мен төлқұжат қана. Ал биатлоншылар үшін бәрі әлдеқайда күрделі. Спорттық қаруды тасымалдау халықаралық ережелермен және әр елдің заңнамасымен қатаң реттеледі.
Бұл процестегі ең басты тұлға - команда басшысы. Оның жұмысы ұшуға бірнеше апта қалғанда басталады. Ішкі істер министрлігінен рұқсат алу, ресми бұйрықтарды әзірлеу және кеден қызметтерімен келісу - тікелей соның жауапкершілігінде.
Әр елге ұшар алдында не қажет?
1. Қаруды әкетуге және әкелуге берілетін арнайы рұқсат;
2. Туризм және спорт министрлігінің бұйрығы;
3. Әрбір қарудың жеке төлқұжаты, ондағы сериялық нөмірлер винтовканың корпусындағы нөмірлермен бірдей болуы шарт;
4. Әуе компаниясымен алдын ала келісім (себебі кез келген тасымалдаушы бортқа қару алуға келісе бермейді).
Команда әуежайға келген сәттен бастап олар үшін арнайы бақылау басталады. Винтовкалар қарапайым жүк ретінде қабылданбайды. Полиция мен қауіпсіздік қызметі әрбір винтовканың нөмірін құжаттағы мәліметтермен мұқият салыстырады. Бір ғана саннан қате кетсе, қару елде қалады. Қару соққыға төзімді қатты кейстерде тасымалданады. Кейстің ішіндегі арнайы жұмсақ қабат винтовканың дәлдік параметрлерін (прицел) кез келген соққыдан қорғайды. Ұшу кезінде винтовкалар тек экипаж бен қауіпсіздік қызметіне ғана қолжетімді оқшауланған арнайы бөлікте болады.
Команда Европа қалаларына ұшып келгенде, кейде рұқсат қағаздары базадан көрінбей қалатын кездер болады. Мұндай сәтте команда ресми делегация мәртебесін дәлелдеп, шекарашылармен келіссөз жүргізеді. Әлемдік тәжірибеде бюрократиялық кедергілердің кесірінен спортшылардың өз қаруын жарысқа бір сағат қалғанда әрең алған жағдайлары да кездескен.
Сондықтан, келесі жолы экраннан биатлоншыларымызды көргенде, олардың винтовкалары әрбір оқ нысанаға дөп тиюі үшін мыңдаған шақырымды және ондаған тексерісті артқа тастап жеткенін естен шығармаңыздар.
Қазақстан биатлонының жетістіктері мен дамуына «Sport Qory» қолдау көрсетіп келеді.
Photo: Kevin Voigt
