Балалар арасындағы сайыс 6 кезеңнен тұрады, оның төртеуі қысқы, екеуі жазғы. Әр кезең еліміздің әртүрлі өңірінде ұйымдастырылады.
"Grand Tour Biathlon" жобасының алғашқы кезеңі 2023 жылдың желтоқсан айында Шығыс Қазақстан облысы, Риддер қаласында өтті. Екінші кезең тұңғыш рет Батыс Қазақстан облысы, Ақсай өңірінде 2024 жылдың қаңтар айында ұйымдастырылды, ақпан айында үшінші кезеңі Павлодар қаласында, наурыз айының басында төртінші кезеңі Щучинск қаласында жалғасын тапты. Кезекті бесінші жазғы кезең шілде айында Петропавл қаласында жоспарланса, шешуші финалдық сайыстар бірінші рет Астана қаласының орталық саябағында өтеді деп бекітілді. Жарыстың жаңа форматы биатлоннан ересектер арасындағы Әлем Кубогі кезеңдеріне сәйкестендірілген.
Қатысушы балалар пневматикалық мылтықтардан пневматикалық қондырғыларға атады. Естеріңізге сала кетейік, осыдан 2 жыл бұрын балалар биатлонын дамыту бағдарламасы аясында Қазақстан Биатлоншылар Одағы биатлон спорты бар барлық өңірлерге пневматикалық қондырғылар мен пневматикалық мылтықтар таратқан болатын.
Жарыс жеңімпаздарын ұйымдастырушылар тарапынан арнайы сыйлықтар күтеді. Сонымен қатар, әр кезең қорытындысы бойынша спринт және жеке жарыс көшбасшылары қызыл жейдеге, ал маусым жеңімпаздары сары жейдеге және жарыс дизайнымен дайындалған атаулы Кубокқа қол жеткізеді.
Рейтинг қорытындысы бойынша ең үздік 5 команда Астанадағы финалдық кезеңде федерация тарапынан спорттық жабдықтар сатып алу үшін белгілі бір қаражат көлемінде сертификаттар иеленеді. Сертификатта көрсетілген қаражат көлемінде жабдықтар сатып алу үшін жеңімпаз команда (аймақ) Федерацияға өтінім жасайды.
Сондай-ақ, Қазақстан Биатлоншылар Одағы жарыс көшбасшыларын халықаралық жарыс деңгейі мен атмосферасын сезіндіру үшін биатлон Отаны — Норвегияға, "Liatoppen" ең ірі балалар фестиваліне жіберуді уәде етті. Норвегияның биатлон федерациясымен болған келіссөздерден кейін, аталған фестивальге біздің елімізден 4 жас биатлоншыға қатысуға мүмкіндік алдық. Осылайша, "Grand Tour Biathlon" жарысының 3 қысқы рейтинг қорытындысы бойынша 2009 жылы туылған 2 ұл және 2 қыз биатлоншыларымыз ақпан айының 10-15 аралығында балалар спортының ең ауқымды іс-шарасында бақ сынады.
Айта кету керек, "Grand Tour Biathlon" жобасын ұйымдастырудағы басты мақсаттардың бірі-өңірлерде бұл спортты дамыту әрі насихаттау, әсіресе жақын уақытта биатлон базасы ашылған аймақтарға қолдау білдіру және Астана қаласында биатлон бөлімшесін ашу. Жоба ұйымдастырушылары бұл жарысты отандық биатлон брендіне айналдыруға ниетті.
