Қош келдіңіз!
Щучинск қаласында биатлоннан жасөспірімдер арасындағы әлем чемпионаты өтеді
2023 жылдың 4-12 наурыз күні аралығында Щучинск қаласындағы Ұлттық шаңғы орталығының базасында биатлоннан жеткіншектер мен жасөспірімдер арасындағы әлем чемпионаты өтеді, деп хабарлайды Қазақстан Биатлоншылар Одағы (ҚБО).
Жаһанның ең мықты жас биатлоншылары бес түрлі сайыста жалпы 18 жарыстың жүлдесін сарапқа салады. Чемпионатқа әлемнің 50 мемлекетінен 800-ге жуық спортшы қатысады деп күтіліп отыр.
«Мұндай ауқымды спорттық іс-шара Қазақстанда тұңғыш рет ұйымдастырылуда. 2018 жылы Щучинск қаласында Ұлттық шаңғы орталығы ашылып, Халықаралық Биатлоншылар одағының сертификаттауынан өтті. Ірі халықаралық жарыстарды өткізуге арналған «А» санатындағы лицензияға ие болды. Биыл стадионда Ашық Азия Чемпионатын өткізгеннен кейін біз Орталықтың өзге де ірі жарыстарға дайындығын пысықтап алдық. Жеткіншектер мен жасөспірімдер арасындағы Чемпионатты өткізу – Қазақстанның биатлон тарихындағы айшықты оқиға. Аталған іс-шара нәтижесінде балалар мен жасөспірімдер арасындағы спортта серпін пайда болатынына сенімдіміз», дейді – Қазақстан Биатлоншылар Одағының Президенті Ермек Қизатов.
Қазақстан жасөспірімдер құрамасының негізгі құрамы желтоқсан айында Щучинск қаласында өтетін Қазақстан Кубогының нәтижелері бойынша белгілі болады.
Спорттық іс-шара ҚР Мәдениет және спорт министрлігі, Ақмола облысының әкімдігі, сондай-ақ Қазақстан Биатлоншылар одағының қолдауымен өткізіледі.